តៃកុងរថយន្តម្នាក់ត្រូវបានអ្នកដំណើរព្រួតគ្នាវាយបែកមុខក្រោយពេលជិះរថយន្តបុកក្មេងស្រីសិស្សសាលា២នាក់បណ្តាលឲ្យរងរបួសធ្ងន់ហើយព្យាយាមរត់គេចខ្លួន

ភ្នំពេញ-ក្មេងស្រីសិស្សសាលា២នាក់រងរបួសធ្ងន់ខណៈជិះកង់ឌុបគ្នាទៅរៀន ត្រូវរថយន្តដឹកអេតចាយមួយគ្រឿងបើកបុកពីក្រោយពេលកំពុងឈប់រងចាំភ្លើងស្តុប។

ដោយហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦និង៣០នាទី ព្រឹកថ្ងៃទី២៣ ខែកញ្ញា ឆ្នាំ២០២៤ ស្ថិតនៅតាមបណ្តោយផ្លូវ៥០ម៉ែត្រកែងនិងផ្លូវ២១៧ ស្តុបបាគូស. សង្កាត់ដង្កោ ខណ្ឌដង្កោ រាជធានីភ្នំពេញ។

យោងតាមប្រភពព័ត៍មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញ ក្មេងស្រីសិស្សសាលារងគ្រោះទាំង២នាក់ខាងលើ បានជិះកង់ឌុបគ្នា ចេញពីផ្ទះបម្រុងនិងទៅសាលារៀន ដោយធ្វើដំណើរក្នុងទិសដៅពីលិចទៅកើតបានឈប់រងចាំភ្លើងស្តុប. ស្របពេលនោះក៏មានរថយន្តដឹកអេតចាយមួយគ្រឿងពាក់ផ្លាកលេខភ្នំពេញ 3B-3910  បើកបរដោយបុរសម្នាក់ក្នុងទិសដៅស្របគ្នាពីលិចទៅកើត ហើយអ្នកបើកបរ បើករថយន្តបណ្តើរ រវល់តែមើលទូរស័ព្ទបណ្តើរ ពុំបានមើលមុខក៏ជ្រុលចង្កូតទៅបុកក្មេងស្រីរងគ្រោះទាំង២នាក់ដែលកំពុងឈប់រងចាំភ្លើងស្តុប នៅខាងមុខបណ្តាលឲ្យរងរបួសធ្ងន់ត្រូវបានបញ្ជូនទៅធ្វើការសង្រ្គោះភ្លាមៗនៅឯមន្ទីរពេទ្យបង្អែកខណ្ឌដង្កោ។ ចំណែកអ្នកបើកបររថយន្តបង្កបានបើកទ្វាររថយន្តចុះរត់គេចខ្លួនតែត្រូវបានអ្នកដំណើរជួយដេញស្ទាក់ចាប់បាននិងនាំគ្នាស្វាគមន៍មួយដៃមួយជើងរងរបួសបែកមុខបែកមាត់យ៉ាងដំណំ។

ក្រោយពេលកើតហេតុសមត្ថកិច្ចប៉ុស្តិនគរបាលរដ្ឋបាលសង្កាត់ដង្កោ សហការជាមួយកម្លាំងជំនាញនគរបាលចរាចរណ៍ខណ្ឌដង្កោ បានចុះមកធ្វើការវាស់វែង នៅទីតាំងកើតហេតុខាងលើនិងឃាត់អ្នកបើកបររថយន្តបញ្ជូនទៅកាន់អធិការដ្ឋាននគរបាលខណ្ឌដង្កោធ្វើសាកសួរតាមនិតិវិធី៕