ភ្នំពេញ-ករណីលួច (ទ្រព្យសម្បត្តិ) កាលពីថ្ងៃទី០៤ ខែសីហា ឆ្នាំ២០២៤ វេលាម៉ោង០៩និង៣០នាទី (ម៉ោងក្នុងកាមេរ៉ាសុវត្ថិភាព) ត្រង់ចំណុចផ្ទះគ្មានលេខ ផ្លូវបេតុង ស្ថិតនៅភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ ។
-ជនរងគ្រោះឈ្មោះ ខៀង រតនៈ ភេទស្រី អាយុ៣១ឆ្នាំ ជនជាតិខ្មែរ មុខរបរអាជីវករ មានទីលំនៅភូមិកណ្ដាលសង្កាត់រលួស ខណ្ឌដង្កោ រាជធានីភ្នំពេញ ។
ដោយជនសង្ស័យចំនួន០២នាក់ ១/ឈ្មោះ សំរ៉ុង មឿន ហៅ ឡូតូ ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ភូមិដូនវង្ស ឃុំទ្រា ស្រុកកណ្តាលស្ទឹង ខេត្តកណ្តាល (អ្នកធ្វើសកម្មភាពមានសារធាតុញៀន) ឃាត់ខ្លួននៅវេលាម៉ោង២០និង៣០នាទី ត្រង់ចំណុចផ្ទះគ្មានលេខ ផ្លូវបេតុង ស្ថិតនៅភូមិក្រាំងពង្រ សង្កាត់ក្រាំងពង្រ ខណ្ឌដង្កោ រាជធានីភ្នំពេញ
២/ឈ្មោះ គី កាមុត ហៅ ហម ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិត្រពាំងកក់ ឃុំទ្រា ស្រុកកណ្តាលស្ទឹងខេត្តកណ្តាល (អ្នកធ្វើសកម្មភាពមានសារធាតុញៀន) ឃាត់ខ្លួននៅវេលាម៉ោង១២និង៥០នាទី ថ្ងៃទី០៦ ខែសីហា ឆ្នាំ២០២៤ ត្រង់ចំណុចផ្ទះជនសង្ស័យ ស្ថិតនៅភូមិត្រពាំងកក់ ឃុំទ្រា ស្រុកកណ្តាលស្ទឹង ខេត្តកណ្តាល ។
សម្ភារ:បាត់បង់: ១/ខ្សែកប្លាកទីនចំនួន០១ខ្សែ , ២/ចិញ្ចៀនមាសចំនួន០១វង់, ៣/លុយខ្មែរ៥,០០០,០០០រៀល
សម្ភារៈបន្សល់ទុក: គ្មាន
ហេតុការណ៍៖ កាលពីថ្ងៃទី០៤ ខែសីហា ឆ្នាំ២០២៤ វេលាម៉ោង០៤និង០០នាទី ទាបភ្លឺ ជនរងគ្រោះឈ្មោះ ខៀវ រតនៈ ភេទស្រី អាយុ៣១ឆ្នាំ និងប្តីឈ្មោះ នៅ សុខជាង អាយុ៤២ឆ្នាំ បានចេញពីផ្ទះជួល គ្មានលេខ ផ្លូវបេតុង ស្ថិតនៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ទៅលក់ខ្ញីនៅផ្សារបន្លែងកួរស្រូវស្ថិតនៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ។ ហើយជនរងគ្រោះបានទុកកាបូកស្ពាយពណ៌ខ្មៅចំនួន០២ក្នុងបន្ទប់ឡៅតឿ ដោយក្នុងកាបូបទាំងពីរនោះ កាបូប០១មានលុយចំនួន៥,០០០,០០០រៀល (ប្រាំលានរៀល) និងកាបូប០១ទៀត មានចិញ្ចៀនមាសចំនួន០១វង់តម្លៃ និងខ្សែកផ្លាកទីនចំនួន០១ខ្សែ តម្លៃ ហើយជនរងគ្រោះបានឱ្យកូនប្រុសឈ្មោះ ចេង ម៉េងជីង អាយុ១៣ឆ្នាំ នៅចាំផ្ទះតែម្នាក់ឯង ។ លុះដល់វេលាម៉ោង១១និង០០នាទី ថ្ងៃខែឆ្នាំដដែល ជនរងគ្រោះនិងប្តីបានត្រឡប់ពីលក់ដូរមកដល់ផ្ទះវិញ ហើយបានឡើងទៅបន្ទប់ឡៅតឿ ដើម្បីយកលុយឱ្យថ្លៃអ៊ីវ៉ាន់គេ ស្រាប់តែបាត់លុយនៅក្នុងកាបូបចំនួន៥,០០០,០០០ រៀល (ប្រាំលានរៀល) រួចជនរងគ្រោះក៏បើកមើលកាបូប០១ទៀត ក៏បានបាត់ខ្សែកប្លាកទីនចំនួន០១ខ្សែ និងចិញ្ចៀនមាសចំនួន០១វង់ពីក្នុងកាបូបខាងលើ រួចជនរងគ្រោះក៏បានមករាយការណ៍ប្រាប់សមត្ថកិច្ច និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលរលួស ដើម្បីឱ្យសមត្ថកិច្ចជួយស្រាវជ្រាវរកជនសង្ស័យ យកមកធ្វើការសាកសួរ និងចាត់ការតាមផ្លូវច្បាប់។ ហើយសមត្ថកិច្ចក៏បានចុះទៅដល់កន្លែងកើតហេតុ ឆែកមើលកាមេរ៉ាសុវត្ថិភាពដែលបំពាក់នៅផ្ទះប្រជាពលរដ្ឋក្បែរកន្លែងកើតហេតុ បានឃើញជនសង្ស័យមិនស្គាល់អត្តសញ្ញាណចំនួន០២នាក់ បានដើរចូលធ្វើសកម្មភាពលួចយកទ្រព្យសម្បត្តិ របស់ជនរងគ្រោះ នៅវេលាម៉ោង០៩និង៣០នាទី(ម៉ោងក្នុងកាមេរ៉ាសុវត្ថិភាព) ថ្ងៃទី០៤ ខែសីហា ឆ្នាំ២០២៤ ។ លុះដល់ថ្ងៃទី០៥ ខែសីហា ឆ្នាំ២០២៤ វេលាម៉ោង២០និង០០នាទី ជនសង្ស័យខាងលើ បានធ្វើសកម្មភាពលួចទ្រព្យសម្បត្តិជនរងគ្រោះឈ្មោះ ហុន ទីន ភេទប្រុស អាយុ២៦ឆ្នាំ ត្រង់ចំណុចផ្ទះគ្មានលេខ ផ្លូវបេតុង ស្ថិតនៅភូមិក្រាំពង្រ សង្កាត់ក្រពង្រ ខណ្ឌដង្កោ រាជធានីភ្នំពេញ ក៏ត្រូវបានសមត្ថកិច្ចឃាត់ខ្លួនបានជនសង្ស័យម្នាក់ឈ្មោះ សំរ៉ុង មឿន ហៅ ឡូតូ ភេទប្រុស អាយុ២៣ឆ្នាំ យកមកធ្វើការសាកសួរនៅអធិការដ្ឋាននគរបាលខណ្ឌដង្កោតាមនីតិវិធីច្បាប់ ។ ក្រោយពីធ្វើការសាកសួរជនសង្ស័យឈ្មោះ សំរ៉ុង មឿន ហៅ ឡូតូ បានឆ្លើយសារភាពប្រាប់សមត្ថកិច្ចថា រូបខ្លួន (ជនសង្ស័យឈ្មោះ សំរ៉ុង មឿន ហៅ ឡូតូ) និងបក្ខពួកឈ្មោះ គី កាមុត ហៅ ហម ភេទប្រុស អាយុ២១ឆ្នាំ ពិតជាបានធ្វើសកម្មភាពលួចទ្រព្យសម្បត្តិ (ចិញ្ចៀនមាស និងខ្សែកផ្លាកទីន) របស់ជនរងគ្រោះឈ្មោះ ខៀង រតនៈ យកទៅលក់ឱ្យអាជីករទិញលក់មាសនៅផ្សារចំបក់ ស្ថិតនៅភូមិសីហា ឃុំចំបក់ ស្រុកបាទី ខេត្តតាកែវ ប្រាកដមែន រួចសមត្ថកិច្ចក៏បាននាំជនសង្ស័យឈ្មោះ សំរ៉ុង មឿន ហៅ ឡូតូ ទៅធ្វើការស្រាវជ្រាវឃាត់ខ្លួនជនសង្ស័យជាបក្ខពួកបានម្នាក់ទៀតឈ្មោះ គី កាមុត ហៅ ហម នៅវេលាម៉ោង១២និង៥០នាទី ថ្ងៃទី០៦ ខែសីហា ឆ្នាំ២០២៤ ត្រង់ចំណុចផ្ទះជនសង្ស័យស្ថិតនៅភូមិត្រពាំងកក់ ឃុំទ្រា ស្រុកកណ្តាលស្ទឹង ខេត្តកណ្តាល យកមកធ្វើការសាកសួរនៅអធិការដ្ឋាននគរបាលខណ្ឌដង្កោតាមនីតិវិធីច្បាប់តែម្តង ៕
