ភ្នំពេញ ៖ បុរសម្នាក់ជិះម៉ូតូទាក់ដៃចង្កូតជាមួយរម៉ុកដឹកអីវ៉ាន់ដែលបញ្ច្រាសទើសគ្នាបណ្ដាលឲ្យដួលបោកក្បាលស្លាប់ភ្លាមៗនៅនឹងកណ្ដាលផ្លូវ ចំណែករម៉ុកបើកគេចចេញពីកន្លែងកើតហេតុ ។
ហេតុការណ៍នេះ កើតឡើងនៅវេលាម៉ោង ១០និង១៥នាទីព្រឹកថ្ងៃទី ២០ ខែកញ្ញា ២០២៤ តាមបណ្តោយផ្លូវហាណូយ ក្បែរផ្លូវរថភ្លើង ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
បើតាមប្រភពពីកន្លែងកើតហេតុបានឲ្យដឹងថាមុនពេលកើតហេតុ គេឃើញបុរសខាងលើជិះម៉ូតូមួយ គ្រឿងម៉ាក ហុងដាស្កុបពី ពណ៌ខ្មៅ ពាក់ស្លាកលេខ ភ្នំពេញ 1IQ -0701 តែម្នាក់ឯង តាមបណ្តោយផ្លូវហាណូយ ក្នុងទិសដៅពីជើងទៅត្បូង ក្នុងល្បឿនលឿន រីឯរ៉ឺម៉កដឹកអីវ៉ាន់ជិះក្នុងទិសដៅពីត្បូងទៅជើង លុះមកដល់ចំណុចកើតហេតុ ម៉ូតូជនរងគ្រោះបានទាក់ដៃចង្កូតបណ្ដាលឲ្យដួលបោកក្បាល ភ្លាមប្រជាពលរដ្ឋនៅជិតកន្លែងកើតហេតុបានទាក់ទងរថយន្តសង្រ្គោះបន្ទាន់របស់មន្ទីរពេទ្យបង្អែកខណ្ឌសែនសុខ ដើម្បីដឹកជនរងគ្រោះទៅសង្រ្គោះ តែជាអកុសលជនរងគ្រោះបានស្លាប់បាត់បង់ជីវិតទៅហើយ ចំណែករម៉ុកដឹកអីវ៉ាន់ឃើញជនរងគ្រោះដួល បានជិះគេចចេញពីកន្លែងកើតហេតុបាត់ស្រមោល ។
សូមបញ្ជាក់ថាទីតាំងខាងលើ គឺមានការដ្ឋានកំពុងកាត់ផ្លូវដាក់តបណ្តាញខ្សែភ្លើង ធ្វើអោយផ្លូវមានការមាមារញឹក ម្ខាងទើបខាងការដ្ឋានបានបញ្ជៀសចរាចរណ៍ អោយមធ្យោបាយធ្វើដំណើរមួយចំនួន មកធ្វើចរាចរណ៍នៅផ្លូវម្ខាងទៀត ដែលជាចំណុចកើតហេតុ ។
សពរងគ្រោះមានឈ្មោះ ភី វិថី អាយុ២៨ឆ្នាំ មានស្រុកកំណើត ភូមិពងទឹក ឃុំស្តេចគង់ខាងជើង ស្រុកបន្ទាយមាស ខេត្តកំពត ។
ក្រោយកើតហេតុសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះមកវាស់វែង និងបានធ្វើកំណត់ហេតុប្រគល់សពទៅឲ្យក្រុមគ្រួសារដឹកយកទៅធ្វើបុណ្យតាមប្រពៃណី៕
