ភ្នំពេញ
យុវជនម្នាក់ បើករថយន្តម៉ាក តូយូតា ព្រុស មួយគ្រឿង រួមជាមួយអ្នករួមដំណើរ២នាក់ផ្សេងទៀត បានបុកម៉ូតូ នឹងកង់បីឥណ្ឌាពីក្រោយមិនព្រមដោះស្រាយ រួចព្យាយាមបើករត់គេចខ្លួនរហូតមកដល់ទឹកដីខណ្ឌ ៧ មករា ខាងក្រោយវត្តមង្គលវ័ន ជ្រុលទៅបុកម៉ូតូមួយគ្រឿង ទើបត្រូវបានពលរដ្ឋឃាត់បានប្រគល់ជូនសមត្ថកិច្ច ។
ហេតុការណ៍នេះកើតឡើងនៅវេលាម៉ោង១៥នឹង ៥០នាទីរសៀលថ្ងៃទី១០ ខែកុម្ភៈ ឆ្នាំ២០២៥ នៅចំណុចខាងក្រោយវត្តមង្គលវ័ន តាមបណ្តោយផ្លូវលេខ ១០៩ ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។
បើតាមប្រភពព័ត៌មានពីកម្លាំងសណ្តាប់ធ្នាប់ខណ្ឌទួលគោកបានឱ្យដឹងថា គាត់ឃើញរថយន្តមួយគ្រឿង ម៉ាក តូយូតា ព្រុស ពណ៌ស ពាក់ស្លាកលេខ ភ្នំពេញ 2AY-6615 បើកបរតាមបណ្តោយផ្លូវលេខ ៦០៨ ឆ្ពោះទៅផ្លូវត្រឡោកបែក ខណៈមកដល់ផ្លូវលេខ ៥៩៨ (ផ្លូវ ត្រឡោកបែក) ក៏ស្រាប់តែបុកម៉ូតូ នឹងកង់បីឥណ្ឌាពីក្រោយ អ្នកបើករថយន្តបានមិនព្រមចុះមកដោះស្រាយបែរជាព្យាយមបើករត់គេច។ ទើបភ្លាមៗនោះ គាត់បានជិះដេញតាមពីក្រោយតែរថយន្តមិនព្រមឈប់បែរជាន់ហ្គែរបន្ថែម បើកគេចរហូតមកដល់ក្រោយវត្តមង្គលវ័ន លើផ្លូវលេខ ១០៩ បានទៅបុកម៉ូតូមួយគ្រឿងទៀត បណ្តាលឱ្យម៉ូតូកៀបជាប់ជាមួយកាងរថយន្តខាងមុខ ធ្វើឱ្យទៅមុខលែងរួច ទើបប្រជាពលរដ្ឋ នឹងសមត្ថកិច្ចឃាត់បានយុវជនទាំង០៣នាក់តែម្តង ។
ក្រោយកើតហេតុសមត្ថកិច្ចខណ្ឌ៧មករាបានមកដល់ចំណុចកើតហេតុ នឹងធ្វើការឃាត់យុវជនទាំង០៣នាក់ រួមនឹងរថយន្តបង្ក យកមកអធិការនគរបាលខណ្ឌ ដើម្បីសម្របសម្រួលបញ្ចប់រឿង ៕
